Category: авто

Category was added automatically. Read all entries about "авто".

Наьна мотт ца хар - сира къайг мо Ieхар!

Оригинал взят у sapral_mikail06 в Наьна мотт ца хар - сира къайг мо Ieхар!
Эрсий дихоамаш, тептараш  е китабаш дешаш вагIаш, дагах цхьа миска уйла сацар са, ма ираз долаш ба-кх эрсий нах. Иштта кхыбола къамаша-м да шоай дог хьаста йишдолаш, ханна аьлча цара шоай мотт беза лелабу, заманаг хьаджа хьакердабоакхаш. Мазнатача тIехьа шоррта оагIувнаш я эрсий, Iингалсай, номачий, паранзий, эспий, Iарбий метташца яздаь дихоамаш a, тайп-тайпар тептараш а. Яц вай меттала-м цхьакха оагIув, из вай миска "Седало" мара, изза а дукхагIа дола хоам эрсий меттал хьагучдоакх, гIалгIай меттал бетта цхьа йоазув хилача тоъам болаш санна хеташ.

Наьна мотт ха беза! Амма из мотт хьона ховболаш, цхьацца хьехарий новкъостал эшаци. Хьо Iингалсай мотт Iомабе дIавулавелача, дошлорг хула ристала миIинга тIа уллаш. Хьайн ховшдоаца, ца кхетадеш дола дош дIакхайда хьажа йишхул, корта лаза а ца боакхаш. Вешта-м таханар деношк мазнатача дукха совдоалаш дошлоргаш да, иштта торжамий гIирсмаьшенаш а я. ГIалгIай дешаш хьо лаха эттача-м сигален тIа кхача мегаш оттаргва саг, из дезаш дола дош кораданза волаш. Мазнатача цаI гIалгIай-эрсий дошлог да, бакъда, цунах доалаш дола пайда-м вирах хьаьншура хьадоалаш мо мара далац-кx хьа. Цудохь эрсий меттац е башхьало вIалла дац моллагIа кхыдола меттац дIабийцача дукха аттагIа да, сакъердамагIа а да, арадоалаш дола кердхоамаш.

Вай гIалгIай гаьнсуртгураг хьажача, дукхагIа дола къамаьл эрсий меттал хоз хьа, "ГIалгIай Хоамашках" тIехьа. Царна шаьрра наьна мотт дIабувца ца хайч, дошэцархошт къамаьл дIацадолга бехка вIалла a бац. Эггара аттагIадар, бетташ хул эрсий дешашца хьаоалаш, таьрахьаша-м аз дувца а дувцац. Оршотден ца ала, "понедельник" аргдолаш ба-кх дукхачара, ванна ца валара, чантар метт царна "декабрь" аьлача хозагIа да, аттагIа а да.

Китабаш дийшач хьаIомабу моллагIа мотт аьнна оал дукхачар. ГIалгIай меттал яздаь китаб хьо лаха эттача, кхеташ боацаш бола номачий меттал китаб йице э хьо, из китаб кха кора ца доагIаш. Дика да-кх вай Къоазой Iийсас цу тайпар хаттар эйдаь долаш, берий китабаш арадайта безам из волаш. КIира денош, бетташ вайн ца хой а, тайп-тайпар оакхарий иштта баьцовгIаш довза мегаргда вай берашт а, вайна а.
Тахана-м китабаш дешаш саг вацар, мазнатача вагIа массавола саг, иштта цIена гIалгIай меттал мара язья йоацаш цаI мукхане оагIув вай мазнатхой хьаелари, мотт Iомабе аттагIа хургдар, диккагIа дагадоагIаргдар. Ханна аьлча, наьна мотт - дега чура сердало да, ший мотт ца ховра - воккха миска саг ва!